ድሆች ለምን ድሃ ሆኑ? የሚለውን ዕድሜ ጠገብ ጥያቄ “ሰነፍ ስለሆኑ፣ የአርባ ቀን ወይም የሰማኒያ ቀን ዕድላቸው ስለሆነ፣ ርግማን ስላለባቸው … ” በማለት በቀላሉ ልንመልስ እንችል ይሆናል። ነገር ግን ድሆች ድሆች የሚሆኑባቸው፣ ድሆችም በመሆኑ የሚቀጥሉባቸው ምክንያቶች ጥልቅ እና ረቂቅ መሆናቸውን ማስተዋል ይጠይቃል። ሰው በተፈጥሮው ድህነትን አይመርጥም ነገር ግን በተለያዩ ምክንያቶች ያለፍላጎቱ ድህነት በጫንቃው ላይ ሊቀመጥ ይችላል። ለዚህም አስተዋጽኦ ሊያበረክቱ ከሚችሉት ነገሮች መካከል የመልካም አስተዳደር እጦት፣ አድልዎ፣ አሳሪ ሕጎችና ደንቦች፣ ሙስና፣ ግጭቶችና መፈናቀሎች በዋነኝነት ሊጠቀሱ ይችላሉ። ድሆች ድምጽ አላቸው፤ ነገር ግን ድምጻቸው እምብዛም አይሰማም። ድምጻቸው እንዲሰማ፣ ከመሰማትም አልፎ እንዲያስተጋባ በዙሪያቸው ያሉ ብዙሃን አብረዋቸው ሊጮሁ ይገባል።
ላቭ ዩር ኔበር ድምጽ ለሌላቸው ድምጽ መሆን አምላካዊ ጥሪ መሆኑን ያምናል። ስለዚህም አማኞች በዙሪያቸው ስላሉ ድሆች በየደረጃው ለሚመለከታቸው አካላት ሁሉ ድምጻቸውን እንዲያሰሙ፣ ሙስናንና ብልሹ አሠራርን ከራሳቸው ጀምሮ እንዲከላከሉ፣ ለማኅበራዊ ሰላምና ፍትህ በትጋት እንዲሠሩ ያበረታታል፣ የበኩሉንም ድርሻ ይወጣል።